Opinn viðburður á vegum utanríkisráðuneytisins, Alþjóðamálastofnunar Háskóla Íslands og Félags Sameinuðu þjóðanna
Á alþjóðlegum degi mannréttinda er tilefni til að ræða stöðu mannréttinda í heiminum og mikilvægi þess að standa vörð um þau til að stuðla að friði og réttlæti. Hvernig tryggjum við vernd og eflum samstöðu á tímum þar sem grafið er undan mannréttindum? Hvernig getur Ísland verið öflugur málsvari mannréttinda á alþjóðlegum vettvangi?
Á tímum þar sem mannréttindi og friður standa víða höllum fæti er það skýr afstaða Íslands að varanlegur friður geti ekki ríkt án virðingar fyrir mannréttindum. Sem smáríki og herlaus þjóð eigum við beina hagsmuni af því að alþjóðalög séu virt og að grundvallarréttindi allra séu tryggð.
Ísland hefur um áratuga skeið unnið að því að efla mannréttindi, frið og öryggi í alþjóðlegu samstarfi. Í því starfi hefur sérstök áhersla verið lögð á jafnrétti kynjanna og stöðu kvenna, réttindi barna og ungmenna, vernd hinsegin fólks og að styrkja lýðræði, tjáningarfrelsi og fjölmiðlafrelsi. Í málstofunni verður fjallað um þessi áhersluatriði og gildi mannréttinda fyrir þróun, frið og öryggi í heiminum og hvernig Ísland getur haft áhrif langt umfram stærð í þessum mikilvæga málaflokki.
Áherslur og aðgerðir Íslands í mannréttindamálum
Opnunarávarp Þorgerður Katrín Gunnarsdóttir, utanríkisráðherra
Pallborðsumræður: Birna Þórarinsdóttir, framkvæmdastjóri UNICEF á Íslandi, Bylgja Árnadóttir, yfirmaður mannréttindamála, utanríkisráðuneyti, Jóhannes Þór Skúlason, gjaldkeri Samtakanna ´78, Jón Gunnar Ólafsson, lektor við Stjórnmálafræðideild Háskóla Íslands og Stella Samúelsdóttir, framkvæmdastýra UN Women Ísland
Málstofustjóri: Kári Hólmar Ragnarsson, dósent við Lagadeild Háskóla Íslands
Boðið verður upp á léttar veitingar frá klukkan 08:45
Öll velkomin en vinsamlegast skráið þátttöku hér
https://forms.office.com/e/ZHPKRz90kC
