Auðnir og álagalönd

Barokkhópurinn Ensemble Elegos mætir aftur til leiks og kynnir nýja ítalska barokkefnisskrá, þar sem tenórinn Enrico Busia syngur verk frá fyrri hluta 17. aldar við undirleik Sergio Coto á teorbu og barokkgítar og Sólveigar Thoroddsen á barokkhörpu. Í þetta sinn er rauði þráðurinn náttúrulýsingar í tónlist 17. aldar - hvort sem efniviðurinn er hjarðlíf meðal blóma eða eldfjallalandslag þangað sem hvorki slangan né úlfurinn hættir sér. Einnig endurómar gamla stefið Romanesca gegnum efnisskrána, en það var grunnurinn að ótal tónsmíðum á síðari hluta 16. aldar og fyrri hluta þeirrar 17. Meðal tónskálda eru Giulio og Francesca Caccini, Francesco Rasi, Marco da Gagliano, Girolamo Frescobaldi og Riccardo Rognoni.

Aðgangseyrir er 3.000 kr.