Հովհաննիսյան ինստիտուտի «Մշակույթ և արդիականացում» ծրագրի շրջանակում տեղի կունենա «Հովհաննիսյան սեմինարների» հերթական բանախոսությունը՝ մշակութային մարդաբան Աղասի Թադևոսյանի «Քրեական ենթամշակույթի ձևավորումը և փոխակերպումները Հայաստանում» խորագրով։
Բանախոսությունը նվիրված է Հայաստանում տարածված քրեական կամ այսպես կոչված «գողական» խոսվածքի բառարանին և երիտասարդության վրա այդ ենթամշակույթի ազդեցությանը։ Քրեական խոսվածքը Հայաստանում, որպես թաղային երիտասարդների առօրյա փոխհարաբերությունների լեզու, արմատավորվեց 1950-1960-ական թվականներին։ Այն հայկական թաղային միջավայր մուտք է գործել Ռուսաստանի ազատազրկման վայրերից և շուտով արմատավորվեց՝ նպաստելով առանձնահատուկ վարքագծային պրակտիկաների տարածմանը։ Արդյունքում հասարակական առօրյա հարաբերություններին հաղորդվեց քրեական բովանդակություն։ Երևույթը տարածում ստացավ հատկապես մեծ և միջին քաղաքների աշխատավորական թաղամասերում, որտեղ «գողական» ժարգոնը և բանտային հարաբերությունների կառուցման հիմքում ընկած նորմերը երիտասարդության շրջանում դարձան լիդերության, հիերարխիկության և տղամարդկության ընկալումների ձևավորման կարևոր գործոն։ Երևույթը, որոշակի փոխակերպումների ենթարկվելով, շարունակվեց նաև անկախության շրջանում։
Բանախոսության ընթացքում անդրադարձ կարվի նաև վերջին շրջանում երիտասարդության վարքագծի վրա ազդող այդ երևույթի փոխակերպումներին։ Զեկույցի հիմքում ընկած են մշակութային մարդաբաններ Աղասի Թադևոսյանի և Նիկոլ Մարգարյանի հեղինակած «Քրեական («գողական») խոսվածքի բացատրական բառարանը» և բառարանի համար իրականացված ազգագրական դաշտային հետազոտության նյութերը։
Բանախոսի մասին
Աղասի Թադևոսյանը մշակութային մարդաբան է: Աշխատում է ՀՀ ԳԱԱ հնագիտության և ազգագրության ինստիտուտում՝ որպես առաջատար գիտաշխատող։ 1995թ. ստացել է պատմական գիտությունների թեկնածուի կոչում ազգագրություն մասնագիտացմամբ։ 2005-2024թթ. դասավանդել է ԵՊՀ պատմության ֆակուլտետի հնագիտության և ազգագրության, ինչպես նաև մշակութաբանության ամբիոններում՝ «Մշակույթ և քաղաքականություն», «Քաղաքային միջավայրի մարդաբանություն» և «Սոցիալ-մշակութային մարդաբանություն» թեմաներով մագիստրոսական ծրագրերում։ 2012-2013 թթ. ուստարում՝ որպես Ֆուլբրայթի հրավիրված հետազոտող, աշխատել է Կալիֆորնիայի Բերքլիի համալսարանում։
Գիտական հետաքրքրությունների շրջանակներն են․
• ուշխորհրդային և հետխորհրդային Հայաստանի անցումային գործընթացների մարդաբանությունը և ինքնության փոխակերպումները,
• պատերազմի մարդաբանությունը,
• միգրացիայի, աղքատության հիմնախնդիրները,
• սովորելու և կրթության մարդաբանությունը։
Նշված թեմաներով ունի հրատարակած մի շարք գրքեր։ Տեղական և արտերկրյա գիտական հրատարակություններում տպագրել է շուրջ 70 հոդված:
Վերջին շրջանում հրատարակվել են Աղասի Թադևոսյանի հետևյալ աշխատությունները․
«Պատերազմը մասնակիցների պատմություններում» մարդաբանական հետազոտություն, 2022թ․, «Քրեական (գողական) խոսվածքի բացատրական բառարան», 2023թ․, «Քաղաքացիական բնակչությունը Լեռնային Ղարաբաղի երկրորդ պատերազմում»․ կորստի և տառապանքի մարդաբանություն, 2025թ․, «Ինչպես են մարդիկ սովորում․ սովորելու փորձառություններ»․ սոցիալ-մարդաբանական հետազոտություն 2025թ․։
You may also like the following events from Հովհաննիսյան ինստիտուտ / Johannissyan Institute:
