Բանախոսություն՝ «Մտածողության և անհատի խորհրդայնացումը 1920-1930-ական թվականների Հայաստանում

📣ԵՊՀ պատմության թանգարանում մեկնարկած «Հայաստանի սովետականացումը 1920-1930-ական թվականներին և դրա արձագանքները հետխորհրդային Հայաստանի ազատական դիսկուրսում» խորագրով նախագծի շրջանակում կիրականացվի բանախոսություն՝ «Մտածողության և անհատի խորհրդայնացումը 1920-1930-ական թվականների Հայաստանում. սոցիալ-մարդաբանական տեսանկյուններ» թեմայով։ Բանախոս՝ մշակութային մարդաբան Աղասի Թադևոսյան։

🔺Հայաստանի խորհրդայնացման առաջին իսկ օրերից հիմնական խնդիրներից մեկը հռչակվեց «նոր աշխարհի» և «նոր մարդու» ձևավորումը։ «Նոր աշխարհ» ասելով՝ բոլշևիկյան քարոզչությունը նկատի ուներ «անցյալի մնացուկ» համարվող «բուրժուական» և «մանր բուրժուական» դասակարգերի ոչնչացումն ու բացառապես պրոլետարական, այսինքն՝ աշխատավորական դասից բաղկացած հասարակության ստեղծումը, իրեն բնորոշ տնտեսական, քաղաքական, մշակութային ու հասարակական կառուցվածքով։ Դասակարգային պայքարը բոլշևիկյան բարոյականության անկյունաքարային բաղադրիչն էր։ Այս համատեքստում հայտարարվեց նոր պրոլետարական մտավորականության և մշակույթի ձևավորման, ինչպես նաև սոցիալիստական ձևով հասարակության արդիականացման անհրաժեշտության մասին։ Հայաստանի հասարակությունը հայտնվել էր իր համար երբևիցե չտեսնված ու աննախադեպ իրավիճակում, որտեղ «ի՞նչ մտածել» և «ինչպե՞ս մտածել» հարցերը մարդու առօրյա կյանքում ստացել էին ճակատագրական կարևորություն։ Նոր ձևավորվող հասարակությունում ինքնությունը և հատկապես դրա մասին խոսելն ու բարձրաձայնելը ոչ միայն կարող էին մարդու ու նրա ընտանիքի ապագան փոխել, այլև ընդհանրապես որոշիչ նշանակություն ունենալ կենդանի մնալու կամ չմնալու հարցում։

📌Նախագիծն իրականացվում է Ֆրիդրիխ Նաումանի «Հանուն ազատության» հիմնադրամի և Երևանի պետական համալսարանի աջակցությամբ։

Մուտքն ազատ է։
ԵՊՀ պատմության թանգարան, Ալեք Մանուկյան 1, Կենտրոնական մասնաշենք, 7-րդ հարկ