ფილიპ გრიმბერი, „საიდუმლო“ - თბილისის წიგნის საახალწლო ბაზრობა

თბილისის წიგნის საახალწლო ბაზრობაზე, რომელიც 20-21 დეკემბერს ექსპოჯორჯიას 4-5 პავილიონებში გაიმართება, გამომცემლობა ზებრა ქართველი მკითხველის წინაშე კიდევ ერთი ახალი ავტორის - ფრანგი მწერლის ფილიპ გრიმბერის წიგნს წარადგენს.

ფრანგი ავტორის რომანი „საიდუმლო“ მეორე მსოფლიო ომის მძიმე რეალობას აღწერს და ძალიან დიდ შთაბეჭდილებას ახდენს მკითხველზე. როდესაც ერთი ადამიანის მიერ ტრაგედია არ არის სათანადოდ გაანალიზებული, შემდეგ თაობებს პრობლემის სახით გადაეცემა და სომატური სიმპტომებითაც შეიძლება გამომჟღავნდეს; სიღრმისეული გააზრების გარეშე კი ფსიქოლოგიური ტრავმის დასაძლევად აუცილებელ უნარს ვერ გამოიმუშავებ. რომანის გმირს სწორედ ასეთ შემთხვევასთან უწევს შერკინება.

პატარა ბიჭსა და მის გარემოცვას შორის ერთგვარი დუმილის კედელია აღმართული. მისი უახლოესი ადამიანები ერთმანეთთან აკრძალული გლოვით არიან დაკავშირებული, რომლის მიზეზებზეც ხმამაღლა არავინ ლაპარაკობს. ყველაფერს ნათელი მხოლოდ მას შემდეგ მოეფინება, როდესაც მის გვერდით აღმოჩნდება ადამიანი, რომელიც მას თვალს აუხელს და სიმართლის დადგენაში დაეხმარება.

„საიდუმლო“ ფრანგული ენიდან მაკა კასრაძემ თარგმნა. წიგნის პრეზენტაცია გაიმართება 21 დეკემბერს 15:30 საათზე თბილისის წიგნის საახალწლო ბაზრობის მთავარ სცენაზე და მას წარადგენენ ფსიქოლოგი ნატა მეფარიშვილი და მთარგმნელი მაკა კასრაძე.