VEÐURLAGSBROYTINGAR, ORKUTILTØK OG RÆTTINDI HJÁ UPPRUNAFÓLKI
- framløga og prát um støðuna hjá sámum
Leygardagin 4. oktobur fáa vit forkunnuga vitjan av Aili Keskitalo úr Norðurnorra. Aili er sámi og starvast hjá Amnesty International Norra við rættindum hjá upprunafólki, veðurlagi og umhvørvi.
At tálma veðurlagsbroytingum er alneyðugt. Í hesi roynd verða stór orkutiltøk sett í verk, og fleiri av teimum í Norðurnorra, har sámar búgva og hava teirra lívsgrundarlag. Fleiri dømi eru um, at hesi orkutiltøk føra stór náttúruinntriv við sær, sum gera seg inn á rættindi hjá sámum. Samstundis sum tað er av alstórum týdningi at tálma veðurlagsbroytingum, er eisini neyðugt at virða rættindini hjá upprunafólki m.a. at útinna sína mentan.
Júst hetta verður snúningsdepilin á tiltakinum, men fyri at skilja avleiðingarnar, sum slík orkutiltøk kunnu hava á mannarættindini hjá sámum, tekur Aili okkum eisini við inn í sámiska søgu og mentan. Tí sámiska mentanin og siðbundnu vinnuvegirnir eru, sum hjá øðrum upprunafólkum, tætt knýttir at náttúruni og týdningarmiklir mál- og mentanarberar.
Tiltakið verður á Reinsarínum leygardagin 4. oktobur kl. 14. Á skránni er fyrst ein framløga, og síðani prátar Ragnheiður Bogadóttir, granskari innan økið, við Aili um spurningar og evni, sum knýta seg at veðurlagsbroytingum, orkutiltøkum og rættindum hjá upprunafólki – bæði í Norra men eisini um allan heim.
Tiltakið er ókeypis, og øll eru hjartaliga vælkomin. Tiltakið er partur av mannarættindafestivalinum, sum Amnesty Føroyar skipar fyri í samband við, at tað í ár eru 60 ár liðin, síðan felagsskapurin var settur á stovn. Síggj alla skránna her:
https://www.facebook.com/events/650179384824133
Aili Keskitalo er fyrrverandi sámiskur politikari og hevur eisini verið forseti í norska Sámatinginum. Amnesty deildirnar í Norra, Svøríki og Finnlandi umframt Sámaráðið hava fyrr í ár givið út frágreiðingina “Just Transition or Green Colonialism”, sum snýr seg um, hvussu miniralúrdráttur og orkutiltøk hótta lívsgrundarlag og mentan hjá sámum í Norra, Svøríki og Finnlandi.
You may also like the following events from Amnesty International Føroyar:
