ДА ПОГЛЕДНЕМЕ КОН ПРИРОДАТА
„Погледнете длабоко во природата и тогаш сè ќе разберете подобро“ – е мислата на Алберт Ајнштајн, темел на визијата на овогодинешниот Слоу Фуд салон. Таа открива едноставна, но суштинска вистина: колку подобро ја разбираме природата, толку подлабоко се разбираме себеси.
Во време кога човештвото се оддалечува од своите корени и ги поткопува темелите на животот, храната останува најискрената врска со светот околу нас. Таа нè потсетува дека сме дел од поголем екосистем, а не негови владетели – нешто што денешните генерации сè појасно го согледуваат.
ПРИРОДАТА И ОДРЖЛИВОСТА
Слоу Фуд одамна укажува дека одржливоста е само почеток. Она што навистина ни треба е регенерација – промена што започнува во нашето размислување и секојдневие и се протега во односите со заедницата, со почвата, растенијата, животните и целиот биодиверзитет. Таа е премин од екстрактивна кон регенеративна култура, каде природата не се троши, туку се обновува и почитува.
Денес, кога човештвото сè повеќе го губи чувството за припадност и местото во екосистемот, Слоу Фуд нè охрабрува не само да „одржуваме“, туку да регенерираме – јазик, навики, односи, заедници, почва, животински, растителен свет. Да создаваме култура што враќа онолку колку што зема.
Прифаќајќи ја сериозноста на времето во кое живееме, станува јасно дека ни се потребни нови модели и храброст да излеземе од зоната на удобност. Целта е една – повторно воспоставување рамнотежа помеѓу човекот и природата.
ХРАНАТА КАКО ВРСКА МЕЃУ ЧОВЕКОТ И ПРИРОДАТА
Храната е мостот меѓу природата и културата. Таа нè враќа кон земјата, водата и почвата, а истовремено го чува нашето наследство, идентитет и радост. Преку одржливо производство и одговорна потрошувачка со грижа за природата, храната станува алатка за преобразба – на нас и на светот околу нас.
Природата e нашата учителка на почит, трпеливост и благодарност.
Слоу Фуд се движи „ЗАЕДНО СО ПРИРОДАТА!“ – бидејќи таа е водичот кон посреќна иднина.
Slow Food Салон 2025 ќе се организира со финансиска поддршка на Министерството за земјоделство, шумарство и водостопанство и шведската организација We Effect.
#SlowFoodSalon2025 #ЗаедноСоПриродата! #SlowFoodMacedonia
