BOKLANSERING: Fyrsten av Emil André Erstad

Forfattaren av «Fyrsten», Emil André Erstad, blir bokbada av redaktør og sjef for sakprosa, Frode Molven. Denne kvelden skal dei snakke om korleis det var å skrive boka som gir eit ufiltrert innblikk i statsministerlivet til Jonas Gahr Støre – mannen som steig til toppen av norsk politikk, men som aldri heilt klarte å riste av seg stempelet som rikmannssonen i Arbeidarpartiet. Midt i ei nasjonal tillitskrise til leiarskapen hans vart Senterpartiet kasta ut av regjeringa og stjerna Stoltenberg henta inn. Det som såg ut som slutten for Støre, vart i staden forvandla gjennom eit politisk meisterstykke.

Saman med Molven og Erstad, blir også AUF-leiar Gaute Skjervø med for å snakke om korleis Støre klarte å gjennomføre snuoperasjonen og korleis vi skal lese boka om Støre i lys av dei andre Ap-biografiane som finst.

Erstad vil også ta oss med inn i arbeidet med å komme forbi dei stengde korridorane og maktkampane i Arbeidarpartiet, og servere skarpe analysar.

Arrangementet varar cirka ein time, og etterpå blir det boksal og signering av bøker.

Vel møtt!