Kunstutstilling av Gry Buer på Losna: Is it a fjord?
Laurdag 28. juni kl. 18.00 opnar eg utstillinga *Is it a fjord?* i Losna Fjøsgalleri. Gjennom måleri og tekst utforskar eg landskapet vi lever i – og korleis det blir endra, tolka og iscenesett. Eg prøver å fange det som er i ferd med å forsvinne – som fuglar vi sjeldan ser, eller natur som blir gjort om til kulisse.
Eg er utdanna ved Kunsthøgskolen i Bergen og medlem i BKSF og NBK. Arbeida mine byggjer på lagvise prosessar – som eit visuelt arkiv over det som glir bort eller blir fortrengt. Eg ønskjer at bileta skal opne for undring, og spegle det tause og levande under overflata.
Utstillinga er del av det kulturelle programmet ved Losna Fjøsgalleri, eit særeige visingsrom drive av Einar Losnegård – ein av dei to fastbuande på øya. Galleriet ligg i eit ombygd fjøs frå 1946, og inneheld i dag både kunstutstillingar og museum i fire rom. Etter mange år med utstillingar under Losnaspelet, er galleriet no ein open møteplass gjennom heile sommarhalvåret, og vert brukt til både konfirmasjonar, konsertar og andre arrangement.
Utstillinga står open i sommar. Velkomen – enten du vil sjå, undre deg, eller berre vere ei stund.
For omvising, ta kontakt med Einar Losnegård.
