Wirt Għawdex se torganizza l-ewwel taħdita fis-serje ta’ taħdidiet għas-snin 2025-2026 nhar il-Ġimgħa 19 ta’ Diċembru 2025 fis-6.30pm fil-Kappella ta’ Santa Ċeċilja, Għajnsielem. It-taħdita, li se tingħata bil-Malti minn Prof. Michael Spagnol u Keith Attard, se tiffoka fuq id-djaletti ta’ Għawdex, bl-isem “Id-Dritt li Tgħawweġ”.
Il-kelliema se juru kif it-taħdit tal-Għawdxin hu differenti minn tal-Maltin, billi jiffukaw fuq il-ħsejjes u l-grammatika tad-djaletti, u fuq kollox fuq il-vokabolarju, kif il-kliem jinbidel fl-għamla u fit-tifsira tiegħu meta naqsmu l-fliegu. Barra minn hekk, se jiġi diskuss ukoll l-“Għawdxi” fil-ħafna forom tiegħu u naraw kif id-djaletti tal-lokalitajiet mhumiex kollha xorta.
Prof. Michael Spagnol jgħallem il-Lingwistika Maltija l-Università ta’ Malta. Jagħmel riċerka dwar it-terminoloġija, id-djaletti, u l-grammatika tal-Malti. Jieħu sehem f’konferenzi internazzjonali u jippubblika studji f’għadd ta’ kotba u rivisti akkademiċi. Kien il-Kap tad-Dipartiment tal-Malti u l-Kap tal-Kumitat tat-Terminoloġija fi ħdan il-Kunsill Nazzjonali tal-Ilsien Malti. Huwa l-editur ta’ "Riċerkaturi", u l-koeditur ta’ "Qabelxejn" u tas-sensiela "Dizzjunarji Speċjalizzati". Imexxi l-paġna "Kelma Kelma" u hu wieħed mill-organizzaturi ta’ "Kelma Kelma Nota Nota".
Keith Attard jgħallem il-Malti fil-Kulleġġ San Elija. Ippubblika żewġ edizzjonijiet tal-ktieb ‘Ballun Pinġut’ (2012, 2014), qarrej tal-provi ma’ Proofreading Malta u Merlin Publishers, u kittieb tal-iskritti tal-programm “Etimoloġija”. Kien il-President tal-Għaqda tal-Malti – Università u l-editur ta’ "Leħen il-Malti" – Għadd 41 u Għadd 42. Għallem il-korsijiet tal-ortografija “Tisħiħ fil-Kitba tal-Malti 1” u “Tisħiħ fil-Kitba tal-Malti 2", u “Il-Malti Pass Pass: L-Ortografija”, organizzati mill-Università ta’ Malta u d-Dipartiment tal-Malti tal-Università.
Wara t-taħdita se jkun hemm ħin għal mistoqsijiet mill-udjenza u diskussjoni. Nirringrazzjaw lill-Delicata Winery talli sponsorjaw ix-xorb għal wara t-taħdita.
Min jixtieq jattendi importanti li jirreġistra b’xejn permezz ta’ din il-ħolqa:
https://docs.google.com/forms/d/e/1FAIpQLSd09zuYAs4nPDmfCDN1YPlVsNlg6wYKwSafeIlK0aQ2rEvaaA/viewform?usp=dialog https://.
L-ispazju fis-sala huwa limitat u l-postijiet mhumiex garantiti. Tingħata prijorità lil min ikun irreġistra.
Wirt Għawdex hija organizzazzjoni volontarja mhux governattiva mwaqqfa fl-1981 bl-għanijiet li jitrawwem l-għarfien tal-wirt tagħna fost il-livelli kollha tas-soċjetà, u taħdem sabiex tissalvagwardja l-patrimonju naturali, arkeoloġiku, storiku u antropoloġiku tal-gżejjer ta’ Għawdex u Kemmuna. Din hija l-ewwel minn serje ta’ taħditiet li se jsiru kull xahar u li jvarjaw fit-tematika tagħhom b’rabta ma’ Għawdex. Il-pubbliku ġenerali mistieden jattendi.
