Saigrace the greatest storyteller of our time

आफ्नो मीठो आवाज अनि पृथक कथा वाचनका शैलीका कारण आम युवाहरू माझ निकै नै लोकप्रिय कथावाचक साइग्रेस वास्तव मैं एक प्रतिभाशाली कलाकार हुनुहुन्छ । गहिरो काव्यिक चेत र मधुर वाचन शैलीको अनुपम संयोजनका कारण वहाँले वाचन गरेका एक दुई हरफहरू मात्र नभै अति नै लामा सिङ्गै उपन्यासको वाचन समेत सुनिरहन मन लाग्दछ । यस्तो किन हुन्छ ?

विशेष गरी काल्पनिक कथाहरूको यथार्थपरक चित्रण र वास्तविक कथाका चित्रहरू समेत विशिष्ट काल्पनिक क्यानभासमा कोर्न माहिर साइग्रेसको यहि खास विशेषताका कारण वहाँले सुनाउने कथाहरूमा स्रोताहरूले आफ्ना जीवन छाम्न पुग्दछन् । जव कल्पनातित घटनाहरू सादृश्य रूपमा घटित भएको महशुस गराउने उर्जा कतैबाट प्राप्त हुन्छ भने त्यस्तो उर्जासँग हामी जो कोहीको पनि विछट्टको अनुराग स्थापित हुन जान्छ । हो, त्यही विशिष्ट उर्जाको नाम हो, कथा वाचक साइग्रेस !

श्रव्यदृश्य सामाग्रीको रसस्वादनका लागि विश्वमैं लोकप्रिय एवं अग्रणी अनलाइन प्लेटफर्म युट्युबमा आफ्नै च्यानलबाट वहाँले उत्पादन तथा प्रशारण गरेका अडियो सामाग्री हाल सम्म करिब १० करोड १७ लाख पटक सुनिएको छ । युट्युब च्यानलमा वहाँका झण्डै ९ लाख सदस्यहरू छन् । त्यस्तै लाखौं स्रोता, प्रशंसकहरूले वहाँलाई विभिन्न प्लेटफर्ममा पछ्याउने गरेका छन् ।

साइग्रेसले २ घण्टा हामीलाई कथा मात्र सुनाउनु हुनेछैन् । हामीसँग दबिएर रहेका अप्रष्फुटित हाम्रा विभिन्न भावलाई पोख्न र हामीलाई ती दमित भावहरूको पीडाबाट मुक्त गराउने कोशिस गर्नुहुनेछ । वहाँले आफ्ना दर्शक, स्रोताहरूसँग गर्ने साक्षात्कार एवं अन्तरक्रियाका थुप्रै अनुभवहरूले हामीलाई यति चाँहि आश्वस्त पार्दछ कि वहाँको सुमधुर आवाजबाट प्रवाहित हुने हर शब्दले हामीलाई जीवन बुझाउनेछ । बाटो देखाउनेछ । सबभन्दा महत्पूर्ण त यो छ कि वहाँसँगको यस बसाइले हामीलाई आनन्दित तुल्याउनेछ । खुशी बनाउनेछ ।

हामीले एक पटक फेरि खुशी हुने मौका प्राप्त गर्नेछौं ।