Í tilefni 45 ára afmælis Umhyggju verður haldið málþing um álagið sem hvílir á foreldrum langveikra og fatlaðra barna. Málþingið fer fram mánudaginn 3. nóvember frá 12.00-16.00 á Hótel Hilton Reykjavík Nordica, Suðurlandsbraut 2.
Fjölbreytt dagskrá verður á málþinginu þar sem fjallað verður um hugtakið „burn-on" í tengslum við lífsörmögnun, „fjórðu vaktina" og fylgifiska hennar ásamt gagnlegum bjargráðum frá foreldrum og fagaðilum.
Doktor Eygló Guðmundsdóttir sálfræðingur mun fjalla um lífsörmögnun hjá foreldrum langveikra barna, m.a. um orsök og afleiðingar.
Teresa Mano og Karen van Meeteren eru báðar mæður langveikra barna með umfangsmiklar umönnunarþarfir. Þær munu kynna rannsókn sem Karen, ásamt öðrum þýskum foreldrum og fagaðilum, unnu að og nefnist "Parents in balance" og fjallar m.a. um hugtakið "burn-on". Hugtakið lýsir ástandi þar sem einstaklingur er andlega og líkamlega úrvinda, en heldur samt áfram í umönnunarhlutverki sínu. Rannsóknin fjallar m.a. um að áhersla ætti að meginstefnu að vera á líðan umönnunaraðila, þar sem heilsa og vellíðan þeirra hefur djúpstæð áhrif á þroska og lífsgæði einstaklingsins með fötlun. Þá munu þær kynna áhættuþætti og stuðningsúrræði sem byggð eru á niðurstöðum rannsóknarinnar ásamt því að deila sinni persónulegu reynslu.
Nína Eck félagsráðgjafi á Landspítalnum mun fjalla um mikilvægi jafningjastuðnings og Bóas Valdórsson framkvæmdastjóri Sjónarhóls segir frá nýstofnuðum jafningjastuðningshópum Sjónarhóls.
Anna Dóra Frostadóttir sálfræðingur á Núvitundarsetrinu mun kynna gesti fyrir ACT meðferðarforminu (Acceptance and Commitment Therapy) en ACT er færniþjálfun til að mæta lífsins verkefnum af auknu æðruleysi, dýpri lífsskilningi og sjálfsmildi. Einnig mun hún leiða hópinn í gegnum núvitundaræfingu.
Petra Fanney Bragadóttir foreldri langveiks barns mun deila sinni reynslu og bjargráðum sem hafa nýst henni vel.
Fundarstjórar verða Sara Rós Kristinsdóttir og Lóa Ólafsdóttir, stjórnendur hlaðvarpsins Fjórða vaktin.
Málþingið er öllum opið og aðgangur ókeypis en nauðsynlegt er að skrá sig.
Kaffiveitingar verða í hléi.
Hér má finna skráningarhlekk:
https://www.umhyggja.is/is/malthing-2025/skraning
Nákvæm dagskrá birtist þegar nær dregur.
