Dagskrá Gallerís Foldar á Menningarnótt í ár er ekki af verri endanum og verða skemmtilegir viðburðir í boði fyrir gesti og gangandi allan daginn.
Við hlökkum til að taka á móti ykkur!
Dagskrá Menningarnætur í Gallerí Fold:
12:00-18:00 Ratleikur
Skemmtilegur leikur fyrir börn og fullorðna sem felst í því að finna vísbendingar í textum við verk sem eru til sýnis í galleríinu og leysa úr stafarugli! Öll sem finna lausnarorðið fara í pott og geta unnið verðlaun!
12:00-18:00 Kynning á Safnaranum áskriftarklúbbi og Eigðu/leigðu kaupleigu
Áhugasöm um áskriftarklúbbinn Safnarann og möguleika í listaverkakaupum fá spurningum sínum svarað og forvitni sinni svalað!
12:00-18:00 Skráning á póstlista
Gestum og gangandi gefst færi á að skrá sig á póstlista Gallerís Foldar. Öll sem skrá sig fara í pott og geta unnið verðlaun!
12:00-18:00 Uppboðskynning
Forsýning á nokkrum verkum sem verða á svokölluðu Perlu-uppboði sem hefst í byrjun september. Á perlu-uppboðum Gallerís Foldar eru sérvalin úrvalsverk eftir okkar þekktustu listamenn.
Listamenn að störfum:
Listamenn Gallerís Foldar setjast við trönur og borð og mála og teikna. Gestir fá innsýn inn í vinnubrögð listamannsins og gefst tækifæri á að fylgjast með listaverki verða til!
13:00-15:00 Hrafnhildur Inga
Hið íslenska veðurfar er Hrafnhildi hugleikið og skilar sér gjarnan á strigann í sínum hættulegasta en jafnframt fallegasta ham. “Veðurfarið breytist stöðugt, viðfangsefnið er endalaust og kemur að sálarlífinu og sköpunargleðinni úr öllum áttum. Það er engin leið að verða þreyttur á því stórbrotna listaverki.“
Hrafnhildur Inga hefur haldið fjölmargar einkasýningar og tekið þátt í samsýningum heima og erlendis. Hrafnhildur verður með einkasýningu í Gallerí Fold í nóvember nk.
14:00-16:00 Daði Guðbjörnsson
Daði Guðbjörnsson er þekktur fyrir litríkar myndir sínar; skraut, flúr og fantasíukennt landslag. Hann fer sínar eigin leiðir og hefur mótað sér sérstöðu í íslenskri myndlist með léttleika og tærum litum, þá sérstaklega í vatnslitum.
15:00-17:00 Margrét E. Laxness
Í litsterkum akrýlverkum Margrétar togast á hið ófullgerða og hið fullgerða, bjartir og dimmir litir keppa og skapa andrúmsloft og rými sem er í senn kunnuglegt og framandi – fullt af fegurð en í bland við sterkar tilfinningar.
16:00-18:00 Rósa Sigrún
Rósa Sigrún er jafnvíg á pensla og prjóna og vinnur ýmist með vatnsliti, textíl eða hárfínar blýantsteikningar. Rósa Sigrún er mikil fjallageit og ferðast mikið um landið, og er flóra landsins henni hugleikin. Blómamyndir hennar eru jafn fallegar og þær eru nákvæmar.
14:00-14:30 - Tónlistaratriði : Raddbandafélag Reykjavíkur
Raddbandafélag Reykjavíkur tekur nokkur lög og hristir upp í stuðinu!
15:00-16:00 - Listamannaspjall : Tinna Royal
Tinna Royal opnaði sína fyrstu sýningu, Þarf að vera fullorðins alla daga?, í Gallerí Fold þann 16.apríl síðastliðinn. Hér leiðir Tinna Royal gesti um sýninguna í laufléttri leiðsögn eins og henni einni er lagið!
18:00 Dagskrá lýkur
|
