Kveðjumessa dr. Steinunnar Arnþrúðar Björnsdóttur

Verið velkomin í kveðjumessu dr. Steinunnar Arnþrúðar Björnsdóttur í Neskirkju, sunnudaginn 31. ágúst kl. 11:00.

Við erum afar þakklát fyrir það mikla framlag sem dr. Steinunn Arnþrúður miðlaði til sóknarinnar á þeim tæpa áratug sem hún þjónaði þar. Meðal annars efndi hún til Biblíulestra, hélt utan um blómlegt samfélag prjónakvenna, vann að uppbyggingu barna- og æskulýðsstarfs og sinnti fólki af alúð jafnt í gleði sem sorg.

Margir hlýddu á hlaðvarp hennar og sr. Sveins Valgeirssonar, Guðspjall, þar sem þau ræddu texta kirkjuársins og miðlu fróðleik á aðgengilegan hátt. Á covid-tímanum nýttist reynsla hennar af fjölmiðlum vel, en þá sendu prestar kirkjunnar vikulega frá sér myndbönd sem Rúnar Reynisson tók upp og bjó til útsendingar.

Gaman væri að sjá ykkur á sunnudaginn kemur. Að messu lokinni verða hnallþórur á borðum. Annað væri það nú.