Folkemøte: Er du klar for langvarig straumstans?

Kva gjer du når straumen går og blir borte lenge? Korleis held du varmen? Korleis kommuniserer du med dine? Korleis tilkallar du hjelp.

Vi er heldige i Noreg. Straumen er nesten alltid på plass i stikkkontakten, men vi veit også at han kan forsvinne – og gjerne dagar i strekk. Seinast no under uvêret Amy var det over 100.000 husstandar som var utan, mange i over eit døgn.

«Alt» er avhengig av straum (og då kunne vi nesten droppa hermeteikna). Både komfort og kritiske samfunnsfunksjonar blir råka eller sett ut av spel når straumen ikkje er der.

På møtet får du møte «beredskapsfamilien» som saman gjer sitt beste for å hindre at kriser skjer og handtere krisene som oppstår. Vi går gjennom dei ulike scenarioa, konsekvensane og kva du og vi i fellesskap kan gjere for å motverke konsekvensane av langvarig straumstans.

Det blir høve til å stille spørsmål.

Egenberedskapsveka er ei nasjonal informasjonskampanje frå Direktoratet for samfunnssikkerhet og beredskap (DSB), som skal gjere innbyggjarane meir medvitne om korleis dei kan klare seg sjølve i ei krise i minst éi veke. Kampanjen blir arrangert kvart år i veke 44, og legg vekt på praktiske råd, samarbeid og å nå ut til ulike grupper, særleg unge under 30 år.