ПРОМОЦИЈА НА СТИХОЗБИРКАТА „НА ТИ СО ЕРОС И ТАНАТОС“ ОД ВИОЛЕТА ТАНЧЕВА-ЗЛАТЕВА

На 20 ноември (четврток), од 19 ч., во Даутпашин амам ќе се одржи промоција на најновата поетска книга на Виолета Танчева-Златева.

По само еден месец од објавувањето, „На ти со Ерос и Танатос“ стана финалист за наградата „Браќа Миладиновци“ на Струшките вечери на поезијата. Но повеќе од фактите за успехот зборува содржината – песните собрани во книгата се едни од најхрабрите на авторката. Со секоја следна стихозбирка, Танчева-Златева ни покажува дека зрелоста и експериментирањето не се секогаш обратнопропорционални.

Академик Иван Џепаровски, во улогата на промотор, ќе ни ја доближи поетската книга во својот препознатлив ерудитски стил. А публиката, која ја каниме од срце на едно несекојдневно доживување (какво што секогаш ни носи поезијата на Виолета Танчева-Златева) самата ќе процени дека ова дело е повеќе од вредно за читање. А задоволството е секогаш поголемо кога се чита книга со потпис од авторката. Па затоа дојди во четврток, слушни, инспирирај се и читај со лична посвета песни што од прва ќе ти се залепат за личноста!